عن اﻷتوسة واﻷتورة والنتوفة

ما الفرق بين اﻷتوسة واﻷتورة والنتوفة ؟ والجواب الطريف :

اﻷتوسة أكبر من اﻷتورة بنتوفة ...!!!

الحقيقة الجواب صحيح ..وهالكلمات موجودة بلهجتنا العامية الخزان التاريخي لكل اللهجات أو اللغات السورية القديمة جدا...ومن معاني هالكلمات رح تعرفوا انو الجواب صحيح مو مزح...

اﻷتوسة : أتسي..أتوسة..توسة = وهي نوع من الحرير البري (من دود القز اللي بيتغذى عاشجر البلوط البري ) النادر جدا والصعب جنيه بوقت قصير قبل تحول الدودة بالشرنقة لفراشة..لهيك اسمه حرير التوسة أو اﻷتوسة =يعني النادر والصعب الحصول عليه..

أما اﻷتورة : أترة ..اﻷترا..= متل اﻷثرالباقي..وهو اسم بيطلقوه على بقايا القطن القليلة الملتصقة بالزهرة وصعب تخليصها..فلما بيجمعوه بيكون فيه بقايا قليلة من الزهرة لهيك سموا هالنوع من القطن باﻷترة (يعني اللي فيه شوائب)

ويعني اﻷثر القليل الباقي...

والنتوفة : نتفة..نتفي..وهي الصوف المنفوش (قبل غزله وفتله وتحويله لخيطان ) والخفيف الوزن والحجم يعني فيكن تقولوا انو النتوفة هي متل وحدة قياس بتدل عالقلة والخفة ...

شفتوا كيف طلعت اﻷتوسة رغم ندرتها هي أكبر من اﻷتورة بنتوفة...

هالكلمات الها جذور بالتاريخ وكانوا يستخدموها أجدادنا بمجال المواد المستخدمة بصناعة اﻷقمشة و النسيج من الاف السنين...