ما سر انتشار الجلطات القلبية بين الشباب هذه الأيام؟
كلنا عم نسمع أخبار وفاة شباب يومياً بأزمات قلبية رغم انو منعرف انو الازمة القلبية بتصيب الكبار أكتر .. فليش هيك
بالبداية لازم نعرف شو أسباب الأزمة القلبية الشائعة عموماً ؟
أولاً : عوامل قابلة للتعديل:
١. ارتفاع الضغط
٢. الداء السكري
٣. الكحول المفرط
٤. التدخين
٥. ارتفاع الشحوم
٦. البدانة والحياة الخاملة
ثانياً: عوامل غير قابلة للتعديل:
١. التقدم بالعمر: فكلنا معرضين لتضيق الشرايين القلبية بعد عمر ٥٥.
٢. القصة العائلية لمرض قلبي مبكر مثلاً وجود أزمات قلبية عند الأخ أو الأب بعمر الشباب وهي الحالة بتنبهنا لموضوع فرط الشحوم العائلي وهوو نادر كتير بصراحة.
معظم أسباب احتشاء العضلة القلبية [95%] تنجم عن تشكل خثرة ضمن الشريان الإكليلي وهالخثرة ما بتتشكل هيك على أرضية سليمة وإنما على شريان ممتلئ بالشحوم !!
ليش عم نشوف الأزمات بعمر مبكر؟؟
نمط الحياة تغير كتير عن أول
مثلاً: وجود السيارة خلانا نقلل من كمية المشي وبذلك خمول بنشاط الجسم وحركتو والتقليل من حرق الدهون بالجسم
مثال تاني: وجود مطاعم الشاورما والأكل الغربي والأكل المشبع بالدسم .. هالشي كلو عم يخلي الشحوم تتراكم بسرعة ضمن شرايين القلب ويزيد فرصة حدوث أزمة قلبية.
مثال تالت: عادة دارجة كتيير حتى ٩٠% من زملائي الدكاترة بيعملوها هية نفس الأركيلة !! منعرف انو فيها استنشاق للغاز السام للرئتين وضرر بضرر والعقل اللي فيه ذرة منطق ما بيرضى فيها .
مثال رابع وكتير من قلب الواقع وما بتتصوروا اديشو عامل مهم!!!
الزعل والتوتر بحكم ظروفنا الحالية والواحد حامل فوق همو وزيادة!!
الزعل والتوتر بيرفع مادة الأدرينالين بالجسم يللي بتسرع القلب وبتستهلك طاقتو وبتقبض الأوعية بالجسم بترفع الضغط وبتسرع تراكم الشحوم بالأوعية!!
مرة اجاني مريض عمرو ٦٠ سنة عم يبكي بالإسعاف .. أول ما أجاني فكرتو عم يتمارض ومبين عليه زعلان من شي.. قربت سألت ابنو شبو العم؟ قلي مطلق أمي من شوي …
زعلت عليه واحترمت عمرو وقلت منعملو تخطيط قلب ولو اني كنت واثق انو الزلمة بس زعلان مالو مريض .. وإلا بتفاجئ انو عندو جلطة بقلبو بعد هالزعلة .
وبهالطريقة منفهم كلنا أنو الاسباب اذاا وقفناها .. اكيد رح تتراجع نسبة حدوث السكتات القلبية
نقطة أخيرة:
حوالي [5%] من الازمات القلبية تحدث نتيجة أسباب اخرى غير الخثرة .. مثل التشوه الخلقي بشرايين القلب أو وجود الجسر العضلي ضمن الشريان القلبي أو التهاب الأوعية الإكليلية. نذكر أنّ السكتات هنا تتظاهر عند الشباب خصوصاً.
د. سومر شلبي
إضافة تعليق جديد