سلطة متوحشة

مو فرقانة ازا بيعرفو مين انا لك طز انا الحق عليي انو ضليت بالبلد، لك يلي حاميها حراميها خالفني شرطي السير قال انو في ضو لوحة المركبة الخلفية مطفي اي معطل (طبعا هادا الضو بيجي اختياري مو اساسي بكتير من السيارات يعني مو قانونا موجودة بكل سيارة) ، قلنالو طيب انا كيف ممكن اعرف ازا شغالين او لا اوازا احترقو وانا ماشي ، قال انا لازم اتفحص المركبة قبل ما امشي فيها ، لك عطيتو لحد 500 ليرة ما رضي ابنل ... وكتب المخالفة المهم رحنا لندفع المخالفة ، قام ****** يلي بيعرّفو قيمة المخالفة وفقا لقانون السير الجديد (طبعا ما رح اسرد بالحديث عن المستوى العقلي والثقافي والرقي بالتعامل يلي الواحد ممكن يواجهو بهيك اماكن) ، المهم بلا طول سيرة قال 7000 ليرة سورية .....عفوا ؟ ليش ليكون عم طير بالسيارة واضويتي مو شاعلة ، فرحت راجعت قانون السير طلع انو المخالفة هي 2000 فقط وكانت هي اللحظة يلي عم طالبها فيها بفتح قانون السير ومراجعتو، تبهدلت بهدلة الكلاب ، لا وشو انا تارك شغلي والبلاوي يلي عم نشتغل فيها لرفع مستوى البلد الحاضري والتقاني بمشاريع الشركة تبعيتنا لاعقد وضح لهل البجم انو في عندون خطأ بقراءة بنود المادة رقم 42 من قانون السير الجديد ، عم يحاسبوني على البند رقم 7 يلي بينص باحد افرعه انو يلي بيمشي بالسيارة و احد الاضوية الامامية او الخلفية او الجانبية(ما بعرف ازا في شي هيك ضو) معطل بيدفع غرامة 7000 ، اما المادة رقم 8 فبتنص انو يلي بيمشي بالسيارة وضو اللوحة معطل يخالف ب 2000 ليرة. لك ما خليت ضابط ولا رئيس نيابة صاحب الحكمة اللامتناهية ما دقيت بابو/ لك رح وصل لعند العميد ريس قسم السير وانا حامل قانون السير تبعون يلي هنن ببلاش بيوزعوه على المواطنين ، وعبث لك السؤال ، ليكون مستحيين يقولولي انو ما بيعرفو يقرو ، او ما حلوة يتراجعو بكلام الموظفة الموقرة الجهبذة بالقانون . لك والله ما رح ادفع غير الحق يلي عليي ، وماني ساكت لو على شو ماكان اخص بس على يلي ساكت على حقو ،وهادا الكلام موجه لكل المواطنين (ان وجودو، طبعا حسب مفهوم الموطانة) وللحديث تكملة غدا لما بوصل لعند قاضي التحقيق المسؤول

اولا غريب كتير انك قريتي قانون السير هاد شي خارج عن العادة عنا شي تاني الي بيمشي عكس التيار بيتعب مشان هيك ادفعي من اولتها وبلا وجع قلب تالت شي لو ماكانت القصة اتاوى وسرقة كانت اكتفت حكومتنا بوضع كميرات على اشارات المرور واماكن المخالفات العامة واختصرت جهد الاف الشرطة اسوة بدول العالم وبعتت هدول الشرطة الي ما عم يعملو شي غير الاذى ليشتغلو شوي بتنضيف الشوارع او تحسين الطرق او حتى تشجير المناطق المتصحرة اكيد لو في شرطي رح يقرا الي انا كتبتو هلاء رح يطالب ب اعدامي لانو قطع الاعناق ولا قطع الارزاق بس انا بقلو روح خود قطعة ارض استصلحا ارحم النا والك او ارعا غنم يمكن تنفك عقدك كل ما تضايقت من غنمة تزبحها

يعني هاالشرطي من وين من المريخ شو بدو يساوي هومواطن جربان تطوع با الشرطة وعمل واسطة لحتى صار باالمرور والله وكيلكم غلة الشرطي مقسومة نص الو ونص للفقراء يلي قاعدين ورا المكاتب

اول شي صار سيادة اللواء مو العميد يا كارو رئيس ادارة المرور وتاني شي ملاحظين بهي الايام انو الشرطة ما عم تقبل مصاري ( طبعا اذا عرف السبب بطل العجب )..... لانو بيطلعلون نسبة جباة ضرائب لانون ؟؟؟ وبالاخير يوجد مقولة "ماثورة سورية طبعا" : في اي دولة بالعالم عندما ترى الشرطي تطمئن.. اما عنا ... انتو كملوها شكرا استاذ نبيل